Қазіргі таңда ақын – жазушылардың шығармалары көпшілік қауым  арасында кітап түрінде ғана емес, сонымен қатар кинофильм арқылы да тарауда. Екібастұз орталық кітапхана ұжымы кітап оқу мәселесін шешу мақсатында бірқатар жұмыстар атқарып келеді. Биылғы жылдан  бастап жасөспірімдердің кітап оқуға деген қызығушылықтарын ояту және балалардың жазғы демалысын қамту мақсатында «Экран бетіндегі кітап» атты библиокинотеатр  жобасын іске қосты. Библиокинотеатрдың көрермендері мектеп жанындағы  жазғы лагердің тәрбиеленушілері, тұрақты оқырмандар және кітапханашылар. Көрермендер әр апта сайын отандық және шетел ақын – жазушыларының экрандалған шығармаларымен танысады. Библиокинотеатрдың әр көрсетілімі арнайы мерейтойлы күндерге арналады. Атап айтсақ, А.С. Пушкиннің туған  күніне, Ұлы Отан соғысының басталуының 75 жылдығына,  Джек Лондонның «Ақ азу» шығармасының 110 жылдығына арналды, алдағы уақытта Астана күніне, Абай атамыздың туған күніне және т.б. мерейтойларға арналған көрсетілімдер жоспарлануда.
Библиокинотеатрдың басында кітапханашылар көрермендерді жазушының өмірбаянымен, шығармашылығымен қысқаша таныстырып өтеді, содан соң экрандалған шығармаға тоқталып көрсетілгелі отырған фильмнің алдына қойған мақсаты туралы мәлімет беріледі.
Осы көрсетілімдерден соң жасөспірімдердің бойында кітап оқуға деген қызығушылықтары оянады деп сенеміз.