Футболдан бірінші лига командалары арасында өткен Қазақстан чемпионаты аяқталды. Қонақ команда «Мақтаралдың» премьер-лигага шығуы анық болса да, ойын соңына дейін тартысты өтті. Өйткені екібастұздық ойыншылар өз жанкүйерлері алдында жеңіске жетуі тиіс болатын.

Ойынның бірінші бөлімі тартысты өтті. Қос команда да алма-кезек шабуылға көшіп, ойында алға шығуға ұмтылды. Десек те командалар ұтымды сәттерді тиімді пайдалана алмады. Ойынның алғашқы бөлімі тең аяқталып, қос команда демалуға кетті.

Үзілісте қала әкімі Ардақ Қаңтарбаев 2005-2007 жылдары туған жасөспірімдердің бірінші және екінші лига ко-мандалары арасында өткен Қазақстан чемпионатының күміс және қола медаль жүлдегерлерін марапаттады. Сондай-ақ, өз топтарында сұрмерген атанған Арман Варданян (2005) мен Еркін Әлімжан (2007) арнайы сыйлықтармен марпатталды. Өз кезегінде клуб басшылығы қала әкіміне клуб футболкасын табыстап, естелік сыйлық сыйлады.

Үзілістен соң «Екібастұз» командасының ойыншылары шабуылды күшейте түсті. Үзіліс уақытында жаттықтырушы Сергей Якушин шәкірттеріне ойын өрнегін өзгертуді тапсырған сыңайылы. Кезекті шабуылдардың бірінде команданың тәжірибелі ойыншысы Асланбек Кәкімов қарсылас қақпашысын қапы қалдырып, гол соқты. Бұл ойынның 70-минуты болатын. Қалған уақытта қос команда қанша шабуылдаса да, есебін өзгерткен жоқ. Со-нымен, соңғы турда жеңіске жеткен екібастұздықтар есесін қайтарды. Өйткені Мақтаралда өткен ойында 1:0 есебімен жергілікті команда жеңімпаз болған еді.