Екібастұздық 10 жасөспірім Отан алдындағы борышын өтеу үшін Алматы облысындағы Үшарал әскери бөліміне аттанды. Қалалық қорғаныс істері жөніндегі біріктірілген бөлім ғимараты алдында өткен жиында ауған соғысының ардагерлері болашақ сарбаздардың рухын қайрап, туған-туыстары сәт сапар тілеп шығарып салды.
Жасақтау бөлімшесінің бастығы Дәурен Мамасиновтың айтуынша, екібастұздықтар әуе-десант әскерінің қатарына қосылмақ. Бұл жыл басынан бергі 10-шы жөнелтілім екен. Ауған соғысының ардагерлері Мұстафа Абдрашимов пен Саттар Мешітбаев әскери кезеңнің адам өміріндегі алар орны ерекше екенін атап өтті. Өйткені әскери қызмет жас бозбалаларды шымыр етіп, рухын бекітеді. Жақсы сарбаз ғана ел басына күн туса, Отан алдындағы парызын адал өтей алады.

Қалалық қорғаныс істері жөніндегі біріктірілген бөлімі бастығы Ержан Ибраев әуе-десант әскеріне қатарына қабылдану үлкен абырой екенін айтты. Немересін шығарып салуға келген 82 жастағы Күләтай Кәрімова жастарға ақ батасын берді.

- Әлішер есімді немерем -22 жаста. Оқуын ойдағыдай тәмамдап, әскер қатарына аттанып барады. Аллаға шүкір, 5 ұлымның барлығы да екі жыл Отан алдындағы борышын қорғаған. Немерем де сол абыройлы жолды жалғап, аман-есен ортамызға оралуына тілектеспін, - деді Күләтай апай.