Жүсіпбек Аймауытов: «Мамандықтың жаманы жоқ, бірақ мұның кез келгеніне икемділік қажет, бұл - жай күнелту, тамақ асыраудың ғана жолы емес, үлкен өнерді, зор шеберлікті қажет ететін нәрсе» дейді. 

Кітапханашының еңбегі қоғам мен мемлекеттің дамып, өркендеуі үшін өте қажет әрі маңызды мамандық екендігін ешкім жоққа шығара алмайды. Эстетикалық талғамы бай, ойы зерек, қиялы жүйрік, өзінің кәсіби шеберлігін шыңдаған, оқырмандарға білім мен қажетті ақпараттың тиімдісін беріп отырған, ой-өрісі кең, жан-жақты, білімді, парасатты кітапханашылардың орны бөлек. Сондай жандардың бірі - Жұмабике Қайырбекқызы Бектасова. 

Солнечный кентінің кітапханасында талай жылдан бері қызмет етіп келе жатқан кітапханашының мінезі ісіне сай. Кентіміздегі кітапхана өте жақсы жабдықталған, сөресі бай, іші таза. Қай уақытта барсаң да есігі ашық, ақжарқын мінезді кітапхана қызметкерлерін көресің. Олар келген оқырмандарды қарсы алумен ғана шектелмей, күн-тізбеміздегі мерекелерімізді бірде-біреуін құр жібермей салтанатты түрде атап өтеді. Мектеп оқушылары, жергілікті тұрғындар үшін іс-шаралар жоғары деңгейде жүргізіледі. Қандай қиын кезеңде де осы кітапхана жабылып қалған емес, сондықтан да «Отарқа» газеті арқылы «Ақниет» әжелер тобы алғысымызды білдіргіміз келеді.